فلسفة الحياة انذوب بالتقسيط
ونترجم عواطفنه ...
نبض غرگان بالصفنات
بأول منعطف يدخل جدمنه النار
نصفن عالصدگ وتفوتنه الخطوات
يتثلم حچينه انضيع ....
نقره اعيونا ..
ونلگه الكتابه ارقام
واحد .....
باگته الصفنه
ونسه اثيابه أعلى جرح الليل
والثاني ....
تعلگ بالرمش متوسد الاحلام
والثالث .....
دخل ساحة سباقه
امسلح بخبثه
والرابع .....
رقم ..اخطر من صلاة الليل
ذب شبچه أعلى روحي
وما دريت شصار
والخامس .....
صفر عاليسره ما محسوب
فلتر بالجگاره يدخن بروحه
صحينه ....
اچفوفنه الغرگانه بالاوهام
باگت كل حلمنه أوقعت عالهم
يا دورة عمرنه ....
الصدگ عالصدگ خل يلتم
يقلقني الحچي واتطشر احچايات
مهره القلق بيه ..
واستحي من الناس
ما تدري الجمر موگد عشگ
بالرأس
من حقي اغار
وازرع اهمومي سچاچين وجمر
اخاف اغفى...
الذئاب امناطره الحراس
والزيتون راوي وتشتهيه الناس
بطلنه لعب ...
صار اللعب قانون
يحكمني بصلافه وعمري
ما محكوم
فدوه لغلطة اعيونك
درّسيني أعلى بر
خل انزع المكتوب
انت اول ذنب ..
والروح كلها اذنوب
يمتى انتوب ....
يمتى انتوب ...
يمتى الغيم يمطر بالچذب
حالوب
يمتى انتوب