كل سنه يمرنه العيد وندعيله ينعاد ومن خد ابو داود نطلب المراد
حمد...
يبن الليالي السود
الطلكن...
جابن الغبشه
حمد عكد البيات).. أيفوح
من عطر الوطن رشه
بصفوف الوطن أول
وهويته فرحة المنجل....
يزرع رازقي وقداح
ويباري بالكلب زرعه
أبيمينه هيبة الجاكوج
يدك التخت للعريس....
وللظالم....
نجر نعشه
حمد ، مينام ليل الضيم
ويكرم للوطن فرشه
حمد ...
لا دنك ولا ذل...
ولا كال الدرب وحشه
يحب الناس وتحبه....
وبكلوب الشعب عرشه
بیه سایه حمد...
والسايه ظلت بيه
شما يكبر حمد ....
بيه تكبر اللوله
حب الطيب....
حب الخير ...
حب الناس...
وحُب الوطن بيه سوله
حمد جرحه جبير....
أجبير
على طول الوطن طوله
من تغفه الشمس (حمدان)
يحط أبكلبه مكواره
(عين الذيب عيب أتنام)
يظل الحارس الجاره
عينه ع السلف لوجاع
يوكل زنده خطاره ...
حمد محله السوالف...
تضحك أبحلكه
لا سده المضيفه ولا طفت ناره
حمد ثارات أله أشكابين
ويسامح ما طلب ثاره
ديوانه بخيت ويحسم الزاره
حمد حب الوطن
حد العظم عشكه
وكلبه للوطن شده
أشكد حب الوطن، حبه
وسلمله الوطن رايه.
وبيده شايل الورده
طش الورد فوك الراس....
وعلك رايته بخده
زغار ، نلعب بالعكد ختيله
تركض العكد (الشيخ والسرحة وبيات)
نختل ابيت (عباس البياتي أبو زينب)
وبيت ( أبو عباس فاضل ، ابن مردان ) الشقاوه
زلمه من حق ومراجل
أبشاربه وخنجره الغيره
أبطيب مفتوحه البيوت
من سطح ... نعبر سطح
نوصل البيت أبن كناي ، عباس أبو عمشه)
أبو عمشه
بلون الكاع .... أسمر
أملون أبدهلة فرات
اشتحفره تشتم عبيره
عاش بعكود المحنه
وروته .. طيب وحنان
فاكد الأم والأبو
وعلى الفطره ...
صار أبو الكل اليتامه
رسب سادس ابتدائي......
وشمله زحف الزعيم
ينجح أبكل الدروس....
ألا ... درس الأنكليزي
لأن ما حب أنكليز
وبطل وعاف الدراسه
اتثقف أبحب المحله
ويحلف أبخبزة الفقره
ماقره ( هيكل وماركس)
ولادرس (فائض القيمه)
ولا قره (لينين وستالين وجيفاره) ونضاله
جان أبو عمشه فكر
ما ورث أبيض وأصفر
ولا ترك أبيض وأصفر
ولا عرف طعم المره
وعاشك ... وعاشك جبير
وكلب ... ينبض بيه وطن
أبو عمشه....
أطيب من الماي وأصعب من جبل
كتب ع الحيطان بعكود المحله
مو صبغ أحمر كتبها
أنكتبت أبدم العراق.................
(وطن حر وشعب سعيد)
وبعكد آخر كتب...............
(الضمائر الشريفه لاتباع بالدنانير)
أتطوقت (الورديه) .....
وجت شرطه ، وعساكر
وأنفُرض حظر التجول....
وما بعد ختيله نلعب
كالو .. وكالو .. وكالو
كالو الكاتبهه واعي
وكالو الكاتبهه ملحد
يريد يبني....
وطن حر بلا قيود
يريد يبني....
مدرسه ومرجوحه وحدايق
تنزرع حب أورود
ملحد وجاحد حقود
كافر اليزرع ورود
ــــــــــــــــــــــــــــ
*القاها في جلسة تأبين الرفيق ابو داود