إلى عقيل حبش
نسمة هوه إبهيئة بشر
بيه الوفه يجري نهر
أيطش على الصوبين حنيه
بتباه التباهي ابن الناصريه
توضه ابحب عراقه
او تيمم بالشيوعية
شامخ فوگ برحيه عراقيه
كل چلمه بلسانه
تطگ بالشوگ حريه
ترف حته امن الترافه أترف
شريف امن الشرف أشرف
نضال او روح ثوريه
حط روحه اعله چفه ساعة الكلفات
ابد ما گال شعليه
الحلة و الغموگه شهود
للروح الفدائيه
صعد للمشنقه او غنه
هزيته الموت او هزنه
شيمة فهد عطر الناصريه
حط حب الحزب قبله
او صله ابغيرة الطيبين
تنخه ابحازم او صارم
ابجمال الحيدري و حسين
بسمل بالوفه او شوگ الشيوعيين
حورية شواطي نگلة الجدمين
نگد ليرات خطواته
او كلامه همسة امحبين
حروف اسمه سجل تاريخ
صفحاته اتناثر طيب
ابعشگ الحزب روحه
عشگ محبوب او حبيب
نخلة شوگ برحيه
ما حملت غير الزين
صفناته حسن نيه
يسولف للنده
الخيط الصبح
للطيف بالچا الجنوبيه
سوالف عن حمد والريل
عن اصويحب او جرحه
عن ليل السجن و امناطره الصبحه
عن عشگه الفخاتي الهور
عن غنيده والنواب
عن الطاگ ( مبني اعگاده عالمهجور )
بس ما طاح
شدوله الضلوع اسلاح
زلم مطربهم النواب
( الهدل أخ الهدل)
لحن بأجمل لحن ينساب
فختايه او حنين الگصب والبردي
طگ بيهه اويه بخت الهور
صينية شمع وابخور
حط السمبگات البيض
لزمور التفگ شاجور
يتنطر( سفن غيلان )
تبحر ٠٠٠ الغيره اشراع
دگ روحه او حلف بالگأع
عزيز الحزب ما ينباع
عطر شوگه ٠٠
عطر من شهگة النعناع
عقيل اويه الحزب عاشگ
مثل عشگ الرمش والعين
عشگ مجنون ٠٠٠
غافي ابشيمة الطيبن
عقيل انته الاسم كافي
يا سچة نضال انته
او عشگ حوريه
يا هيبه او مهابه او عز
او رمز ثوار ٠٠٠ !
يا رمز الشيوعيه